Beitningaskúrinn opnaður til sýningar

nóv 12, 2013

1000355_10202369982560928_1775115651_nÍ nóvemberbyrjun var Beitningaskúrinn við Óðinshús opnaður til sýningar.  Beitningaskúrinn var byggður 1925 á blómaskeiði vélbátaútgerðar á Eyrarbakka.  Það var aðgerðahús, netaverkstæði og einnig var þar beitt. Hin svonefnda Austurbryggja eða Heklubryggja var fyrir neðan Beitningaskúrinn en hann stóð í röð margra slíkra húsa sem einu nafni nefndust Byrgin.

Sýningin vekur athygli á sögu Beitningaskúrsins, vélbátaútgerðar á Eyrarbakka og einnig er sagt frá vinnuaðferðum og sögum frá þeim sem þar unnu.  Þar var síðast beitt um 1960.  Beitningaskúrinn var gefinn Sjóminjasafninu á Eyrarbakka 1991. Hann var gerður upp með styrk frá Húsafriðunarsjóði á árunum 1992 og 1993. Við viðgerðina kom í ljós útflattur bátur á vesturhlið hans og var ákveðið að hafa hann sem ystu klæðingu á þeim vegg.  Vekur Beitningaskúrinn því mikla athygli fyrir sérstakt útlit.

Ráðgjafar við uppsetningu sýningarinnar voru Finnur Arnar og Þórarinn Blöndal. Beitningaskúrinn er opinn eftir samkomulagi við safnstjóra Lýð Pálsson, í síma 891 7766.