Uncategorized

1 2 3 6

Dagskrá Jónsmessuhátíðar á Eyrarbakka 2021

Haldin verður Jónssmessuhátíð á Eyrarbakka dagana 25.-26. júní. Þetta er fjölskylduvæn hátíð og margt til skemmtunar. Dagskráin er hér að neðan:

Fimmtudagur 24.júní

Skreytingardagur | Hvetjum til götugrills og almenns sprells

Föstudagur 25. júní

Kl. 17:00 Jónsmessubolti UMFE | Brennubolti
Í ár verður keppt í brennubolta, skráning liða á staðnum. Mæting við Barnaskólann á Eyrarbakka. Áhorfendur hvattir til að mæta og hvetja sitt lið áfram. Grillaðar pylsur og drykkir í boði að keppni lokinni. Rauðaliðið hreppti farandsbikarinn síðast, hver verður sigurvegarinn í ár? read more

Missir – sumarsýning í Húsinu á Eyrarbakka

Persónulegir hlutir verða gjarnan dýrgripir eftirlifenda þegar ástvinur deyr. Þannig geyma látlausir hlutir líkt og pappírsbátur, herðasjal og sparibaukur oft mun dýpri sögu en virðist í fyrstu. Löngu seinna rata slíkir gripir á safn; kannski þegar tíminn hefur grætt sárin. Á sumarsýningunni Missir í borðstofu Hússins á Eyrarbakka er ljósinu beint að þessum fallega sið og tilfinningagildi gripanna heiðrað.

Sögutími sýningarinnar færir gesti aftur á fyrri hluta 20. aldar þegar ekki þótti sjálfsagt að allir næðu háum aldri. Mikil breyting hefur orðið á viðhorfi samfélagsins síðan þá. Dauðinn var fólki mun nálægari áður fyrr, en sorgin var borin í hljóði. Viðsnúningur hefur orðið svo nú er talið mikilvægt og eðlilegt að tjá sig um missi en dauðinn sjálfur virðist fólki fjarlægari.  read more

Hvernig væri að leggja leið sína á Eyrarbakka og heimsækja söfnin?

Hvað er sniðugra en að gera sér ferð á Eyrarbakka og líta á söfnin sem þar er að finna nú þegar faraldrinum er að linna? Húsið, Kirkjubær og Sjóminjasafnið á Eyrarbakka taka vel á móti þér og þar er opið kl 11-18 alla daga í sumar.

Í Húsinu er sögð saga þessa merka húss sem byggt var 1765 og er í hópi elstu húsa á Islandi. Það var kaupmannssetur frá upphafi til 1927 þegar Eyrarbakki var verslunarstaður Sunnlendinga. Hægt er að skoða þessa merku byggingu hátt og lágt og er sagan við hvert fótspor. Í viðbyggingunni Assistentahúsinu eru valdir þættir úr sögu héraðsins kynntir gestum og má þar m.a. sjá nýja sýningu um Vesturheimsferðir. Fyrir norðan Assistentahúsið er Eggjaskúrinn með áhugaverðri náttúrusýningu. read more

Hvað á húsið að heita?

Byggðasafn Árnesinga flytur á næstu vikum innri starfsemi sína í Búðarstíg 22 á Eyrarbakka sem byggt var á tímabilinu 1970-1983 sem fiskvinnsluhús. Um langt skeið var þar rekin álpönnuverksmiðja en Byggðasafn Árnesinga keypti húsið árið 2019. Síðan þá hafa iðnaðarmenn verið að störfum og er verið að aðlaga húsið að þörfum safnsins. Í húsinu verður varðveisluaðstaða fyrir safnkostinn, vinnuaðstaða, skrifstofur starfsmanna og fjölnota sýningarsalur.   read more

Eyrarbakkaljósmyndir Sigurðar kaupmanns

Þann 27. mars kl. 14 opnar sýning á Eyrarbakkaljósmyndum Sigurðar Kristjánssonar kaupmanns á Eyrarbakka. Sýningin er haldin í borðstofu Hússins á Eyrarbakka.

Sigurður Kristjánsson (1896-1977) kaupmaður á Eyrarbakka var áhugaljósmyndari sem tók myndir af sínu nánasta umhverfi hvort sem það var fjölskyldan, heimilið, þorpið eða hátíðarhöld. Athyglisverðar eru ljósmyndir hans af gömlum húsum og staðsetningu þeirra sem gefa einstakt sjónarhorn á Eyrarbakka um miðja 20. öld. Mörg húsanna sem Sigurður fangaði með ljósmyndavél sinni eru nú horfin. read more

Ferðalangar í heimsókn

Það var líf og fjör hjá okkur á Byggðasafni Árnesinga fyrir skemmstu þegar galvaskir hópar frá leikskólanum Álfheimum brugðu undir sig betri fætinum og tóku strætó frá Selfossi og hingað á Eyrarbakka til okkar. Heimurinn hafði sannarlega stækkað, mátti lesa úr svip þessara yndislegu barna sem skoðuðu alla króka og kima safnsins áður en þau héldu til fundar við leikskólastjórann sinn sem hafði komið með hádegismatinn þeirra á Eyrarbakka. Eftir mat teiknuðu þau fyrir okkur myndir og síðan héldu þau könnunarferð sinni áfram, gölluðu sig upp og héldu syngjandi glöð í fjöruferð. Við þökkum kærlega fyrir okkur og vonum að þau taki fljótlega aftur strætó til okkar! read more

Safnfræðsla í Fjölbrautaskóla Suðurlands

Starfsmenn Byggðasafns Árnesinga heimsóttu nemendur Ergo – Umhverfisfræði  í Fjölbrautaskóla Suðurlands á dögunum. Tilefni heimsóknarinnar var fræðsludagskrá sérsniðin að viðfangsefni nemendanna í áfanganum. Yfirskrift heimsóknarinnar var Saga hluta, saga mannkyns, saga jarðar. Nemendur fengu innsýn í sögu safna og tilgang þeirra fyrr og nú. Eins voru ýmsir safnmunir skoðaðir og settir í samhengi sem undirstrikaði smæð mannsins í hinu „stóra samhengi“ en jafnframt þau gífurlegu áhrif sem mannkynið hefur haft á jörðina á afar stuttum tíma. Nemendur unnu í framhaldinu verkefni um eigin föt, veltu fyrir sér uppruna og sögu textílsins og skráðu hann líkt og um eiginlegan safnmun væri að ræða. Það var verulega skemmtilegt að hitta þessa vösku krakka sem sannarlega eru að kljást við stórar spurningar á hverjum degi. read more

Framkvæmdir við safnið

Í vor flytur Byggðasafn Árnesinga innri aðstöðu sína úr Hafnarbrú 3 í Búðarstíg 22. Búðarstígur 22 er að jafnaði nefnt Alpan-húsið en nú væri upplagt að finna byggingunni nýtt nafn í takt við nýtt hlutverk. Húsnæðið var keypt af safninu árið 2019 fyrir innra safnastarf, skrifstofur, varðveisluaðstöðu, fræðslurými og sýningarsal. Síðan húsnæðið var keypt hefur verið unnið að framkvæmdum og stefnt að verklokum í vor.

Grímur Jónsson verktaki og menn hans ásamt undirverktökum hafa undanfarna mánuði unnið að viðgerðum og aðlögun húsnæðis að nýju hlutverki. Framkvæmdum lýkur í apríl. read more

Jólakveðja

Byggðasafn Árnesinga sendir hugheilar jóla- og nýárskveðjur til allra velunnara sinna og starfsmanna. Árið 2020 var fordæmalaust ár. Vonandi verður næsta ár gæfuríkara.

1 2 3 6