Fimm fornleifafræðingar undir stjórn Ragnheiðar Glóar Gylfadóttur fornleifafræðings unnu að fornleifagreftri á Vesturbúðarlóðinni þrjár vikur í maí. Grafið var upp vestasta húsið, Fönix. Kom í ljós hleðslur undir Fönix og má áætla að þær hleðslur séu eldri.

Fönix var einnig nefnt kornhúsið og var eitt húsa Vesturbúðarinnar sem voru verslunarhús Eyrarbakkaverslunar til 1925. Þessi hús voru fjögur til sex eftir því hvernig þau voru talin og þangað komu bændur af öllu Suðurlandi til viðskipta á meðan Eyrarbakki var aðal verslunarstaðurinn. Hús Vesturbúðarinnar voru byggð a mismunandi tímum en að grunni voru þau frá fyrrii hluta 18. aldar. Vesturbúðin var rifin árið 1950. read more

Eitthundraðasti rampurinn á landsbyggðinni verður tekinn í notkun við Sjóminjasafnið á Eyrarbakka þriðjudaginn 9. ágúst klukkan 14:00.  Öllum er boðið á viðburðinn en sérstakir gestir verða leikskólabörn frá Strandheimum á Eyrarbakka og Stokkseyri og eldri borgarar. Innviðaráðherra og bæjarstjóri Árborgar verða með stuttar ræður. Aron Freyr Jónsson mun svo vígja rampinn við Sjóminjasafnið.

Verkefnið, Römpum upp Ísland hófst formlega með vígslu á fyrsta rampinum þann 23. maí s.l. í Hveragerði. Þriðjudaginn 9. ágúst er komið að 100 rampinum sem staðsettur verður við Sjóminjasafnið á Eyrarbakka. read more

Tvo sunnudaga í röð 14. og 21. ágúst verður Ásta Guðmundsdóttir sýningarstjóri með leiðsögn um sumarsýninguna Hafsjór – Oceanus. Þessi einstaka listasýning teygir sig um öll húsakynni byggðasafnsins og umhverfi þess. Sýningin samanstendur af verkum þeirra 20 listamanna sem tóku þátt í samnefndri listahátíð fyrr í sumar. Listafólkið kom víða að, frá Nepal, Suður Kóreu, Þýskalandi, Spáni, Ítalíu, Mauritius, Indlandi, Litháen, Póllandi, Frakklandi og Íslandi. Allir unnu með sögu og menningu svæðisins sem skilaði sér í viðamikilli sýningu sem vekur forvitni og eftirtekt. Ásta færir gesti frekar inn í þann undraheim.   read more

Við birtum hér nokkrar myndir frá lokahófi listahátíðarinnar Hafsjór Oceanus um liðina helgi og þökkum öllum gestum kærlega fyrir að koma og taka þátt í gleðinni með okkur. Listamennirnir færðu okkur bæði einstaka listgjörninga og viðburði og eru búin að fylla safnið og umhverfi þess af list sinni. Við þökkum þeim öllum kærlega fyrir sitt framlag og ómetnalegt samstarf og Ástu Vilhelmínu Guðmundsdóttur sýningarstjóra fyrir frábærlega vel heppnaða hátíð. Safnið er opið alla daga kl 11 – 18. read more

Laugardaginn og sunnudaginn 11.-12. júní komandi helgi er komið að lokapunkti Alþjóðlegu listahátíðarinnar Hafsjós/Oceanus við Húsið á Eyrarbakka. Opnaðar verða sýningar sem standa fram á haust í ólíkum rýmum safnsins. Dansgjörningar, tónlist og fleira verða um helgina. Sjón er sögu ríkari. Frítt er á safnið báða daga. Sjá nánar hér fyrir neðan.

Byggðasafn Árnesinga og listakonan Ásta Vilhelmína Guðmundsdóttir standa að hátíðinni sem styrkt er af Uppbyggingasjóði Suðurlands og fjölmörgum fyrirtækjum. Listamennirnir eru alls 20 talsins frá 12 löndum. Þeir hafa dvalið í mánuð á Eyrarbakka og unnið list sína úr umhverfinu. read more

Viltu koma og heyra hvernig kaffikvörn syngur? Má bjóða þér að óma HAFSJÓR inná hljóðlistaverk eða þrykkja stein á tau? Eða langar þig að sjá hvernig listamenn umbreyta kartöfluskemma í svið og stíga dans við undarlega tóna?

Ef þetta hljómar áhugavert þá ættir þú endilega að leggja leið þína á  Eyrarbakka um helgina en þar stendur nú yfir alþjóðlega listahátíðin Hafsjór – Oceanus.

Á  föstudagseftirmiðdag 3. júní kl. 17.00 taka nokkrir listamenn á móti gestum í byggðasafninu í Húsinu. Anil Subba hljóðlistamaður frá Nepal ásamt Im Tae Woong frá Suður Kóreu sýna hvernig þeir draga hljóð úr ólíkum hlutum. Kaffikvörn er orðin hluti af hljóðfærum þeirra. Einnig fá gestir að þrykkja með bleki á tau undir leiðsögn Sung Baeg frá Suður Kóreu og fólk má gjarnan koma með eigin bol til að þrykkja á ef það óskar þess.  Pólverjinn Piotr Zamojski er að vinna að hljóðlistaverki um hafið og óskar eftir aðstoð frá fólki. Hann verður inni í Eggjaskúr að taka upp raddir fólks. Þetta er mjög einfalt; þáttakendur eru beðnir um að segja upphátt: Hafsjór eða H-A-F-S-J-Ó-R. Upptökurnar verða síðan hluti af listaverki hans á sýningu í Húsinu í sumar. read more

Hafsteinn Hafliðason einn fremst garðyrkjumaður landsins heimsækir Eyrarbakka sunnudaginn 29. maí og verður með erindi og leiðsögn við safnið.

Í borðstofu Hússins stendur nú yfir sýningin Með mold á hnjánum þar sem stiklað er á stóru yfir sögu og þróun garðyrkju í Árnessýslu. Það er þannig kjörið tækifæri til að fá Hafstein til að miðla með sér fróðleik úr heimi garðyrkjunnar.  Hafsteinn hlaut heiðursverðlaun garðyrkjunnar árið 2018. Hann vann lengst af hjá Blómavali en einnig sem garðyrkjustjóri í tveimur sveitarfélögum.  Hafsteinn hefur kennt við Garðyrkjuskóla ríkisins, setið í ritstjórn Garðyrkjuritsins skrifað bækur og greinar og starfað sem sjálfstæður garðyrkjuráðgjafi svo fátt eitt sé nefnt. Nýjasta stórvirki hans er bókin Allt í blóma sem kom út á þessu ári. read more

Á miðvikudagskvöld 18. maí er tilvalið að líta inn í Húsið á Eyrarbakka en þar verður lauflétt kynning á alþjóðlegu listahátíðinni Hafsjó – Oceanus og hefst samkoman kl. 19.00. Ásta Vilhelmína Guðmundsdóttir listakona og sýningarstjóri kynnir nýhafna listahátíð og listamenn frá öllum heimshornum taka á móti gestum. Kakó, smákökur og furðusnakk verður í boði og allir eru velkomnir.  

Sjálf listahátíðin verður lyftistöng fyrir samfélagið því á næstu vikum munu listamennirnir vinna verk sín á Eyrarbakka og sækja innblástur bæði úr nærsamfélaginu og úr safninu. Afraksturinn verður sumarsýning sem mun teygja sig um fjölmörg rými byggðasafnsins. Í heilan mánuð verða líka alls kyns viðburðir, vinnusmiðjur og uppákomur í boði fyrir gesti og gangandi og er vert að fylgjast vel með okkur á samfélagsmiðlum því ýmislegt verður kynnt með stuttum fyrirvara. Nánari um listhátíðina má sjá á samfélagsmiðlum og á heimasíðunni www.oceanushafsjor.com read more

Sumaropnun hefur tekið gildi á safninu og geta gestir nú heim´sótt safnið alla daga kl. 11-18 til loka september.

Þema sumarsins er Hafsjór en listamenn úr öllum heimshornum munu í sumar skapa list og sýna á safninu. Sjá OCEANUS HAFSJÓR (oceanushafsjor.com)

Safnið verður þátttakandi í Jónsmessuhátíð Eyrarbakka 25. júní.

Skólar og hópar skulu panta tíma hjá safnstjóra í síma 891 7766. Að öðru leyti þurfa gestir ekki að gera boð á undan sér og allir velkomnir. read more