Byggðasafn Árnesinga býður upp á notalega jólastemningu á aðventunni. Upplestur rithöfunda og skálda, bókastund fyrir börn, jólaævintýri, hátíðleg jólalög og jólasýning Hússins á Eyrarbakka. Jólaandinn verður á Eyrarbakka!

Sunnudaginn 28. nóvember, klukkan 16:00, lesa höfundar úr nýútkomnum verkum sínum. Í ár heimsækja Húsið þau Harpa Rún Kristjánsdóttir, Einar Már Guðmundsson, Ólína Kjerúlf Þorvarðardóttir, Haukur Ingvarsson, Inga Kristjánsdóttir og Benedikt Jóhannsson. Um er að ræða fjölbreyttan hóp upplesara sem lesa úr skáldsögum, ljóðabókum og fræðiritum. read more

Tekið hefur verið í notkun nýtt einkennismerki fyrir Byggðasafn Árnesinga. Sylvía Kristjánsdóttir grafískur hönnuður á Eyrarbakka hefur hannað nýja merkið.  Það táknar bátinn Farsæl og glugga safnahúsanna. Brátt má sjá þetta nýja merki á öllum safnahúsum, öllu bréfsefni, heimasíðu og á auglýsingum og merkingum safnahúsa.

Það er ýmislegt á döfinni hjá Byggðasafni Árnesinga. Sunnudaginn 31. október 2021 klukkan 14:00 verður leiðsögn um sýninguna Missi. Þar eru til sýnis persónulegir hlutir sem urðu dýrgripir eftirlifenda þegar ástvinur dó. Látlausir hlutir líkt og pappírsbátur, herðasjal og sparibaukur geyma oft mun dýpri sögu en virðist í fyrstu. Á sýningunni Missi er ljósinu beint að þessum fallega sið og tilfinningagildi gripanna heiðrað. Linda Ásdísardóttir, sýningarstjóri, mun leiða gesti í gegnum þessa einstöku sýningu sem engin ætti að láta framhjá sér fara. Sýningin hefur verið vel sótt og er þetta síðasta sýningarhelgin. read more

Byggðasafn Árnesinga í Húsinu á Eyrarbakka verður opið um helgar í október og eftir samkomulagi. Opnunartíminn er kl. 13 til 17 laugardaga og sunnudaga. Í borðstofu er sýningin Missir. Opið er í Eggjaskúrinn og Kirkjubæ. Helgina 9.-10. október verður listasmiðja í Kirkjubæ undir stjórn Davíðs Arts Sigurðssonar og eru allir ungir sem aldnir hvattir til að líta þar inn.  Sunnudaginn 31. október verður Linda Ásdísardóttir sýningarstjóri með leiðsögn um sýninguna Missi. Ókeypis er í safnið í október. read more

Skrifstofa Byggðasafns Árnesinga hefur verið flutt frá Hafnarbrú 3 að Búðarstíg 22 á Eyrarbakka. Síminn þar er 483 1082 og netfang info@byggdasafn.is. Síminn hjá Lýði Pálssyni safnstjóra er 891 7766 og netfang lydurp@byggdasafn.is.

Samhliða flutningi skrifstofunnar er um þessar mundir unnið að flutningi safnkostsins úr Hafnarbrúnni í Búðarstíginn. Lýkur því verki í septemberlok. Er nýja varðveisluaðstaðan hin glæsilegasta og aðgengi og aðbúnaður að safngripum framúrskarandi.  Hafnarbrú 3 sem safnið hefur nýtt frá 2002 hefur verið selt og verður ekki lengur notuð í þágu safnastarfseminnar. read more

Haldin verður Jónssmessuhátíð á Eyrarbakka dagana 25.-26. júní. Þetta er fjölskylduvæn hátíð og margt til skemmtunar. Dagskráin er hér að neðan:

Fimmtudagur 24.júní

Skreytingardagur | Hvetjum til götugrills og almenns sprells

Föstudagur 25. júní

Kl. 17:00 Jónsmessubolti UMFE | Brennubolti
Í ár verður keppt í brennubolta, skráning liða á staðnum. Mæting við Barnaskólann á Eyrarbakka. Áhorfendur hvattir til að mæta og hvetja sitt lið áfram. Grillaðar pylsur og drykkir í boði að keppni lokinni. Rauðaliðið hreppti farandsbikarinn síðast, hver verður sigurvegarinn í ár? read more

Persónulegir hlutir verða gjarnan dýrgripir eftirlifenda þegar ástvinur deyr. Þannig geyma látlausir hlutir líkt og pappírsbátur, herðasjal og sparibaukur oft mun dýpri sögu en virðist í fyrstu. Löngu seinna rata slíkir gripir á safn; kannski þegar tíminn hefur grætt sárin. Á sumarsýningunni Missir í borðstofu Hússins á Eyrarbakka er ljósinu beint að þessum fallega sið og tilfinningagildi gripanna heiðrað.

Sögutími sýningarinnar færir gesti aftur á fyrri hluta 20. aldar þegar ekki þótti sjálfsagt að allir næðu háum aldri. Mikil breyting hefur orðið á viðhorfi samfélagsins síðan þá. Dauðinn var fólki mun nálægari áður fyrr, en sorgin var borin í hljóði. Viðsnúningur hefur orðið svo nú er talið mikilvægt og eðlilegt að tjá sig um missi en dauðinn sjálfur virðist fólki fjarlægari.  read more

Hvað er sniðugra en að gera sér ferð á Eyrarbakka og líta á söfnin sem þar er að finna nú þegar faraldrinum er að linna? Húsið, Kirkjubær og Sjóminjasafnið á Eyrarbakka taka vel á móti þér og þar er opið kl 11-18 alla daga í sumar.

Í Húsinu er sögð saga þessa merka húss sem byggt var 1765 og er í hópi elstu húsa á Islandi. Það var kaupmannssetur frá upphafi til 1927 þegar Eyrarbakki var verslunarstaður Sunnlendinga. Hægt er að skoða þessa merku byggingu hátt og lágt og er sagan við hvert fótspor. Í viðbyggingunni Assistentahúsinu eru valdir þættir úr sögu héraðsins kynntir gestum og má þar m.a. sjá nýja sýningu um Vesturheimsferðir. Fyrir norðan Assistentahúsið er Eggjaskúrinn með áhugaverðri náttúrusýningu. read more

Ársskýrsla Byggðasafns Árnesinga fyrir starfsemina árið 2020 er komin á vefinn. Sjá hér: Arsskyrsla-2020.pdf (byggdasafn.is)

Byggðasafn Árnesinga flytur á næstu vikum innri starfsemi sína í Búðarstíg 22 á Eyrarbakka sem byggt var á tímabilinu 1970-1983 sem fiskvinnsluhús. Um langt skeið var þar rekin álpönnuverksmiðja en Byggðasafn Árnesinga keypti húsið árið 2019. Síðan þá hafa iðnaðarmenn verið að störfum og er verið að aðlaga húsið að þörfum safnsins. Í húsinu verður varðveisluaðstaða fyrir safnkostinn, vinnuaðstaða, skrifstofur starfsmanna og fjölnota sýningarsalur.   read more